BDSM ဆိုသည်မှာ….

ဒီစကားလုံးကို ကျွန်တော်တို့ အားလုံးကြားဖူး၊ တွေ့ဖူးကြမှာ သေချာပါတယ်။ အပြာဆိုက်ဒ်တွေမှာ ခေါင်းစဉ်တစ်ခုအနေနဲ့ တွေ့ရလေ့ရှိပြီး Fifty Shades Of Grey ဇာတ်ကားကလည်း ဒီစာလုံးလေးလုံးနဲ့ ပတ်သက်ပြီး လူသိများထင်ရှားလှတဲ့ ဇာတ်ကားကောင်းတစ်ခုဖြစ်ပါတယ်။ ဒါပေမယ့် BDSM အကြောင်းကို ကောင်းကောင်းသိတဲ့သူ ဘယ်နှစ်ယောက်များရှိပါသလဲ။ ဒီကိစ္စနဲ့ ပတ်သက်ပြီး စာဖတ်သူအမျိုးသားတို့ သိသင့်သမျှကို သိစေရပါမယ်။

BDSM ၏ အဓိပ္ပါယ် ဖွင့်ဆိုချက်

BDSM ဆိုတဲ့ စကားလုံးလေးတွေက Bondage & Discipline (ချည်နှောင်ခြင်းနှင့် စည်းကမ်းသတ်မှတ် ထိန်းချုပ်ခြင်း)၊ Sadism and Masochism (ညှင်းပန်းနှိပ်စက်ခြင်းဖြင့် ကာမသာယာမှု၊ နာကျင်မှုအပေါ်ကျေနပ်မှု) ဆိုပြီး အဓိပ္ပါယ်တွေကို အနီစပ်ဆုံးမှတ်ယူနိုင်ပါတယ်။ တကယ်တော့ BDSM ဆိုတာ အဆင့်နိမ့်နေရာများမှာ Role Paly လုပ်ဟန်ဆောင်ခြင်း၊ ညှင်းပန်းနှိပ်စက်ပြီး စည်းကမ်းကြပ်မှတ်ခြင်းနဲ့ နာကျင်မှုနဲ့ဆက်စပ်တဲ့ လိင်ပိုင်းဆိုင်ရာ ကျေနပ်မှုတို့ကနေ ကာမသာယာမှုတွေကို ဖန်တီးတာဖြစ်ပါတယ်။ BDSM ကို လိင်မဆက်ဆံခင် ကိုယ်လက်နှီးနှောရာမှာ လိင်စိတ်ပိုမိုတက်ကြွစေဖို့ နည်းလမ်းတစ်ခုအနေနဲ့ အသုံးပြုကြပါတယ်။

Bondage & Discipline
ပိတ်ထားတဲ့ အခန်းတံခါးနောက်ကွယ်မှာ ချည်နှောင်ခြင်းဆိုတာက သာမာန်အဓိပ္ပါယ်တွေနဲ့ ကွဲပြားပါတယ်။ ဒီနည်းလမ်းကို အသုံးပြုတဲ့သူတွေမှာ Top သို့မဟုတ် Dominator လို့ခေါ်ဆိုတဲ့ အထက်စီးရသူ သခင်နဲ့ Bottom သို့မဟုတ် Submissive နှိမ်ချခံရသူ အစေခံ ဆိုတဲ့ နေရာတွေကို ရွေးချယ်ရပါတယ်။ လိင်စိတ်ပိုမိုကြွတက်လာဖို့အတွက် ခန္ဓာကိုယ်လက်အစိတ်အပိုင်းတွေကို ချည်နှောင်ထားတာတွေ ပါဝင်ပါတယ်။ စတင်လုပ်ဆောင်သူတွေကတော့ ခြေလက်တွေလောက်ကိုပဲ ချည်နှောင်ကြပြီး ခါးပတ်၊ လည်စီး၊ လက်ထိပ်စတာတွေကိုပဲ အသုံးပြုကြပါတယ်။ အကြမ်းစားနှစ်သက်တဲ့ ဝါရင့်သမ္ဘာရင့်ပုဂ္ဂိုဟ်တွေကတော့ သာယာမှုပိုမိုရရှိဖို့အတွက် ခြေလက်တွေသာမကာ လိင်အင်္ဂါအစိတ်အပိုင်းတွေပါ ချည်နှောင်ထားလို့ရတဲ့ ကိရိယာတွေကို အသုံးပြုတတ်ကြပါတယ်။ အသက်ရှုကျပ်အောင်လုပ်တာကလည်း Bondage ရဲ့ အစိတ်အပိုင်းတစ်ခုပဲဖြစ်ပါတယ်။ Discipline (စည်းကမ်းသတ်မှတ် ထိန်းချုပ်ခြင်း)ကလည်း သိပ်တော့မကွာပါဘူး။ ကွာခြားချက်တစ်ခုကတော့ ဘယ်လိုနေ၊ ဘယ်လိုလုပ်ဆိုတာတွေကို ကြိုတင်သတ်မှတ်ထားပြီး ဒီသတ်မှတ်ချက်ကို ဖောက်ဖျက်ခဲ့ရင် အပြစ်တစ်ခုခုပေးတဲ့ နည်းလမ်းဖြစ်ပါတယ်။ အပြစ်ပေးတဲ့နေရာမှာ လက်ဝါးနဲ့ရိုက်တာ၊ ကျာပွတ်နဲ့ရိုက်တာတွေလိုမျိုး ရုပ်ပိုင်းဆိုင်ရာအပြစ်ပေးမှုတွေ ရှိသလို ချိုးချိုးနှိမ်နှိမ်ပြောဆိုဆက်ဆံတဲ့ စိတ်ပိုင်းဆိုင်ရာအပြစ်ပေးမှုတွေလည်း ရှိပါတယ်။ သာယာမှုကို နာကျင်မှုကနေတဆင့် ခံစားစေတာ၊ ခံစားရတာက နှစ်ဦးနှစ်ဖက်လုံးကို အစွန်းဆုံးထိ ကိလေသာစိတ်တွေ ဖြစ်ပေါ်စေနိုင်ပါတယ်။

Sadism & Masochism
ဒီစာလုံးနှစ်ခုက BDSM ရဲ့ အနှစ်ပဲဖြစ်ပါတယ်။ Sadism နဲ့ Masochism နှစ်ခုစလုံးက နာကျင်မှုကနေ လာတာဖြစ်ပါတယ်။ နာကျင်အောင်လုပ်သူနဲ့ နာကျင်ခံရသူတွေ ပါဝင်ပါတယ်။ Sadism (ညှင်းပန်းနှိပ်စက်ခြင်းဖြင့် ကာမသာယာမှု)မှာ လိင်ဆက်ဆံဖက်ကို နာကျင်အောင်လုပ်ရပါတယ်။ ဒီလိုလုပ်တဲ့နေရာမှာ စကားနဲ့ပြောဆိုဆက်ဆံတာ၊ လက် ဒါမှမဟုတ် ကျာပွတ်နဲ့ရိုက်တာ၊ အသက်ရှုကျပ်အောင် လုပ်တာ၊ ဖယောင်းစက်ချတာ၊ ကျင်စက်နဲ့တို့တာတွေအထိ အမျိုးမျိုးရှိပါတယ်။ Maschism (နာကျင်မှုအပေါ် သာယာကျေနပ်မှု) မှာတော့ နာကျင်အောင်လုပ်တာတွေကနေတဆင့် လိင်စိတ်နိုးကြွလာပြီး သာယာမှုရှာတာဖြစ်ပါတယ်။

BDSM ရဲ့အကြောင်းကတော့ ဒီလောက်ပါပဲ။ ရုတ်တရက်တွေးကြည့်လိုက်ရင် စိတ်လှုပ်ရှားစရာကောင်းတယ်လို့ ထင်ရပေမယ့် လိင်ဆက်ဆံဖက်က သဘောတူညီမှ ကျင့်သုံးရမှာ ဖြစ်ပါတယ်။ အပေါ့စားနည်းလမ်းတွေလောက်က ပြဿနာမရှိပေးမယ့် စိတ်လှုပ်ရှားလွန်းပြီး စိတ်လွတ်သွားမယ်ဆိုရင်တော့ တစ်ဖက်လူကို ထိခိုက်မိစေနိုင်ပါတယ်။ BDSM နဲ့ပတ်သက်ပြီး သိထားသင့်တဲ့ အချက်တွေကိုလည်း ဖော်ပြလိုက်ပါတယ်။

၁။ BDSM ဆိုတာ Bondage & Discipline, Sadism & Masochism ကို ကိုယ်စားပြုပါတယ်။ ဒီ နည်းလမ်းတွေထဲက တစ်ခုခု ဒါမှမဟုတ် အားလုံးကို ကျင့်သုံးတာမျိုးကို ခေါ်ပါတယ်။

၂။ BDSM က ပုံမှန်မဟုတ်တဲ့ လိင်ဆက်ဆံမှုဖြစ်ပါတယ်။ ကာမဆက်ဆံမှုတစ်ခုမှာ သာယာမှုကို မြင့်တင်ပေးတဲ့ နည်းလမ်းတစ်မျိုးဖြစ်ပါတယ်။

၃။ BDSM လို့ပြောတိုင်း အမြဲတမ်း လိင်ကိစ္စနဲ့ ပတ်သက်နေတာမဟုတ်ပါဘူး။ တစ်ချို့တွေက ဒီနည်းလမ်းတွေနဲ့ ခန္ဓာကိုယ် နာကျင်မှုနဲ့ သာယာမှုကိုသာ ခံစားတတ်ကြပြီး တစ်ချို့တွေကတော့ လိင်ကိစ္စအထိ လုပ်ဆောင်တတ်ကြပါတယ်။

၄။ အင်အားသုံးပြီး လိင်ဆက်ဆံမှုပြုလုပ်တာက BDSM မဟုတ်ပါဘူး။ BDSM မှာ နှစ်ဦးနှစ်ဖက်လုံး သဘောတူညီမှုရှိဖို့ လိုအပ်ပါတယ်။

၅။ BDSM ဆိုလိုက်တိုင်း ကျာပွတ်တွေ၊ ချိန်းကြိုးတွေ၊ လက်ထိပ်တွေ ပါမှ မဟုတ်ပါဘူး။ ဒီကိစ္စမှာ စည်းမျဉ်းမရှိပါဘူး။ နာကျင်မှုမရှိပဲ အာရုံခံစားမှုပိုကောင်းတဲ့ နည်းလမ်းတွေလည်း ပါဝင်ပါတယ်။ တစ်ယောက်ပြောတဲ့အတိုင်း နောက်တစ်ယောက်က ဘာမဆိုလုပ်ဖို့ သဘောတူရင် BDSM လို့ ပြောလို့ရပါတယ်။

၆။ BDSM နည်းလမ်းကျင့်သုံးသူတွေမှာ Top နဲ့ Bottom ဆိုပြီး အုပ်စုနှစ်မျိုးခွဲလို့ ရပါတယ်။ Top နေသူတွေကတော့ အသာစီးရသူ၊ နာကျင်စေသူတွေဖြစ်ပြီး Bottom နေသူတွေကတော့ ခိုင်းသမျှလုပ်ရသူ၊ နာကျင်ခံရသူတွေ ဖြစ်ပါတယ်။

၇။ BDSM လုပ်တော့မယ်ဆိုရင် နှစ်ဦးနှစ်ဖက် ဘာကိုကြိုက်တယ်၊ ဘာကိုမကြိုက်ဘူး၊ ဘာကိုတော့ လက်ခံနိုင်တယ်၊ ဘာကိုတော့ လက်မခံနိုင်ဘူးဆိုတာကို အတိအလင်းဆွေးနွေးထားဖို့ လိုပါတယ်။

၈။ လိင်မှုကိစ္စရှုပ်ပွေးသူတွေမှာ BDSM ကို ကျင့်သုံးတာမဟုတ်ပါဘူး။ တစ်လင်တစ်မယားစနစ်ကျင့်သုံးသူတွေလည်း BDSM လုပ်ဆောင်သူတွေ ဖြစ်နိုင်ပါတယ်။

ဒီလောက်ဆို ရှင်းလောက်ပြီထင်ပါတယ်။

Gentleman Magazine
www.tolimolishop.com